港珠澳星期二三無須預約！預約通行制是創新還是倒退？
運輸署宣布：「由2025年9月1日起，逢星期二及三，『港車北上』計劃下的車輛無須預約便可經港珠澳大橋出行前往廣東省，指定日子除外。」
消息一出，不少人拍手叫好，覺得終於有「進步」了。唔使預約兩日，真係好感動。但大家有無諗過，其實我哋一開始就唔應該要「預約」去行一條橋？
港珠澳大橋，全長55公里，總投資超過1269億人民幣，堪稱世界奇蹟。這條巨型基建應該是為促進粵港澳大灣區融合、提升交通效率、便利市民出行而設。但建好之後，香港人竟然要**「預約」**才可以開車上橋，仲要睇日子、睇配額，感覺好似搶演唱會飛一樣荒謬。
請問，世界上有邊條大橋喺需要預約出行先行得？
你去美國開金門大橋，會有人叫你預約咩？
金門大橋1937年就建好，到今日仲係24/7 任人過，收錢就收錢，但唔會限制你自由。反觀我哋呢條2025年仍然要靠「制度」限制人流的大橋，喺進步咗？定係越嚟越 backward？
當然，政府話預約係為咗安全、車流管制等等。呢個理由表面合理，但實質係咪反映緊背後制度配套根本未準備好？如果系統無法應付自由出行，點解要興建一條咁貴的大橋？而家搞到好似有橋都冇得用，擺明係資源浪費。
即使家陣話「逢星期二、三唔使預約」，但點解唔可以全面開放？點解唔可以像真正的大都市一樣，讓人民自由選擇出行時間？係咪怕塞車？咁就要問… 條橋唔係本來就喺為咗承載大量車流咩？
結語：而家喺2025年，難道唔可以用AI或者交通數據去推測邊一日會多車？
人工智能、智慧交通講咗咁多年，點解唔可以用數據做動態調節，而係要市民死守預約制度？ 搞咁多創科項目，結果仲係靠一套死板系統控制通行…. 咁唔係本末倒置咩？
我們不是反對管制，但反對「為管制而管制」的形式主義。如果政府真心想推動「港車北上」、促進粵港融合，就應該真正讓市民「便捷出行」，而唔係繼續用一堆手續和限制來製造不便。
希望有一日，港珠澳大橋可以像金門大橋一樣，成為連接兩地的「自由之橋」，而唔係一條要睇日子、睇配額、睇心情才能用的大白象。
